- لوعمل الطالب موقع عام يوضح المشروع والموقع

الرد : طب فين الكونسيبت .. مفيش مشروع يبدأ من غير كونسيبت

- عمل الطالب فكرة تشكيلية بيحاول يتفلسلف فيها

الرد : مين قالك إن الفكرة لازم تكون فلسفية .. ممكن تكون في الموقع أو الإنشاء أو الوظيفة



- لو الطالب عامل فكرة تشكيلية كلها أشكال منحنية

الرد : انا عايز أعرف فين الموديول التصميمي ؟؟ يا ابني مفيش مشروع يتحل من غير الموديول


- لو سمع الطالب الكلام ومشي على الموديول

الرد : ده تصميم تقليدي جداً .. يا ابني العمارة دي انتهت من العشرينات وانت لازم تتفرج وتزود ثقافتك المعمارية


- لو راح الطالب واتفرج على كام مجلة وعمل تشكيل يعني كويس بس فيه اكتر من كتله

الرد : يا ابني انت عمرك ما سمعت عن النظام الإنشائي .. الكلام ده مش هتعرف تشيله .. روح اسأل حد في مدني علشان يفهمك


- الطالب راح وتوصل لنظام إنشائي جديد وجاب الدليل على انه موجود وبيتنفذ ..

الرد : يا ابني انت هنا في مصر والتكلفة عنصر مهم جداً في العمارة ولازم تراعي ده وانت بتختار النظام الإنشائي



- الطالب قام عامل نظام إنشائي تقليدي كمرة وعمود او حاجة شبه كده

الرد : يا ابني هو حد قالك ان المشروع ده هيتنفذ .. انت هنا جي عشان تتعلم وتشوف حاجات جديدة


- الطالب عمل تشكيل بسيط من كتلة نحتية واحدة ..

الرد : المشروع بسيط قوي وممكن تقول عليه ساذج بصراحة .. احنا لازم نحاول نعمل علاقات تشكيلية في الموقع العام والواجهات


- الطالب قعد يشتغل في الموقع العام علشان يعمل تشكيل ..

الرد : يا ابني الموقع العام مش كفاية وده مين اللي هيشوفه انت فاكر الناس راكبه طيارة .. لازم يكون التنشكيل في الثري دي


- الطالب يعمل كتلة من عدة تشكيلات متداخلة ..

الرد : يا ابني انت متعرفشي إن فيه حاجة اسمها علاقات تشكيلية ومبادئ تشكيل يعني في حاجة اسمها رتم مثلاً ولا انت عمرك ما سمعت عنه


- الطالب يعمل رتم ويسمع الكلام

الرد : ايه يا ابني الرتم الممل ده انت لازم تكسر الرتم علشان تكسر الاحساس بالملل


- يكسر الطالب الرتم ويعمل تشكيل مفكك

الرد : بص بأه هتشتغل ديكونستراكشن .. انا معنديش مشكلة بس لازم تتفرج وتفهم الفلسفة اللي ورا الاتجاه ده


- يحاول الطالب يتفلسف تاني في التشكيل بتاعه

الرد : دي بأه بيسموها فلسفة فارغة بعيد عنك .. الكلام ده ايه علاقته بوظيفة المبنى


- يعمل الطالب مشروع وظيفي يحاول فيه يحقق البرنامج

الرد : هي اه الوظيفة مطلوبة بس ان التصميم يكون جميل مهم برضه


- يعمل الطالب تشكيل فيه استطالة أفقية

الرد : المشروع تحس كده انه نايم على الأرض ومش واضح خالص من الكتل اللي حوليه


- يعمل الطالب تشكيل رأسي

الرد : التشكيل ماله واقف كده ليه .. لازم تكون فيه حاجة أفقية توزنه


يبالغ الطالب في التشكيل

الرد : التشكيل بتاعك قمة التناقض مع المباني اللي في الموقع


- يحاول الطالب يعمل تشكيل ماشي مع الموقع

الرد : المشروع تايه كده وسط الموقع وغير مميز على الإطلاق


- يحاول الطالب يعمل تشكيلات متداخل وكثيرة

الرد : التشكيل معقد جداً يا ابني .. حاول تبسطه شوية


- يحاول الطالب عمل مشروع في شوية تشكيل مع الوظيفة ..

الرد : يا ابني التشكيل غير متزن .. هتقولي ازاي هقولك دي حاجة بالإحساس


- قعد الطالب يحاول يوزن التشكيل ..

الرد : لسه برضة لازم تفكر ان يكون في كتلة مسيطرة


- يعمل الطالب كتلة مسيطرة

الرد : هي وزنت التشكيل فعلاً .. بس أيه اهمية الفراغ ده أصلاً علشان يبقى بارز كده .. لازم التشكيل يرتبط بالوظيفة


- يرجع تاني للوظيفة يحاول يظبطها

الرد : الوظيفة كلها بايظة يعني مثلاً عندك كام سلم وكام حمام .. الحاجات دي كلها بتتحسب مسمعتش عن كتاب نويفرت


- يحاول الطالب يحسب الوظائف بمساحتها

الرد : الحاجات دي جبتها منين .. ده كتاب نويفرت .. صفحة السلالم .. دي صفحة الوفيات يا ابني


- يجيب الطالب كل حاجة من كتب المعلومات ..

الرد : يا ابني احنا كل حاجة هننقلها . فين مجهودك انت .. يعني كتاب نويفرت ده بقاله ميت سنة


- يعمل الطالب تشكيل في الموقع العام

الرد : يا ابني لازم تأكدلي على المداخل في الموقع العام .. المداخل لازم تكون واضحة


- يحاول الطالب يأكد على المداخل

الرد : لأ انت فهمت غلط التأكيد ده يكون كمان مرتبط بالواجهات


- يصمم الطالب الواجهات ..

الرد : الواجهة عادية جداً وملهاش أي علاقة بالموقع العام الجميل اللي انت عامله .. هتقولي أعمل ايه .. هقولك انت اللي عاملت الموقع العام الجميل ده .. يبقى تحاول تعمل الواجهات


- يحاول الطالب يعمل واجهات مختلفة .. أكثر من اقتراح

الرد : يا ابني احنا هنعمل قرعة .. المشروع لازم يكون له واجهة واحدة


- يختار الطالب واجهة يكمل عليها ويطورها

الرد: يا ابني مين اللي بيشوف الواجهة دي .. لازم التفكير يكون في الثري دي ويكون معاه سكشن كمان علشان نشوف علاقة التشكيل بالفراغات الداخلية


- يعمل الطالب المطلوب سكشن وثري دي

الرد : انت مش عارف أصلا تختار خط قطاع يوضح مشروعك .. خط القطاع ده مبيوضحشي حاجة


- يكمل الطالب في الثري دي والسكشن ..

الرد : انت برضه لسه مستغلتشي عناصر التشكيل زي الألوان والخامات والملمس


- يستخدم الطالب الألوان في التعبير

الرد : لأ خد بالك احنا هنسلم المشروع أبيض واسود .. يعني كل الكلام ده مش هيبان


- يعمل الطالب مشروع وظيفي محلول كويس

الرد : انت مسمعتش عن حاجة اسمها ابواب وسلالم هروب ..


- يحسب الطالب أبواب وسلالم الهروب ..

الرد : مال المسقط الأفقي بقى مفتت كده ليه .. حاول تربطه


- عمل الطالب كل حاجة ...

الرد : روح راجع الإسقاط أنا حاسس إن في حاجة غلط .. راجع بس وتعالى ..


- راجع الطالب الإسقاط ..

الرد : الإخراج بتاعك سيئ جداً .. خد بالك دي أول حاجة بنشوفها .. والجواب يبان من عنوانه



وبذلك ينتهي الوقت المحدد للمشروع ويتم تسليم المشروع .. ويتم تقييمه في وقت قياسي كالعادة .. و يستحق الطالب التقدير المشهور ( c ) .. بجدارة واستحقاق .. دون أدنى مسئولية .. على المعيد .. الذي قام بدوره ووضح للطالب جميع الأخطاء ..



ملحوظة : على المعيد أن يقوم بعمل تباديل وتوافيق بين الردود وذلك من أجل التنوع في الرد بين الطلبة في السكشن الواحد

هذا الدليل يجب تحديثه دائما بالردود الجديدة .. حتى يتم تجديد الردود كل عام

مش كل المعيدين طبعا

بعد هذا الموضوع ... ربنا يستر

الموضوعالأصلي : c+ ...........للطلاب فقط  المصدر : anaM3mari.com

7lw awy da bs tweeeeel

الموضوعالأصلي : c+ ...........للطلاب فقط  المصدر : anaM3mari.com